Fever, la plataforma líder mundial de descubrimientu d’entretenimientu en vivu, trai los conciertos Candlelight a Xixón con una serie de presentaciones especiales, empezando con un conciertu de Tributu a Coldplay. Esta espansión vien de la mano del ésitu de la esperiencia, agradando a audiencies en más de 100 ciudaes a nivel mundial, incluyendo ciudaes como Madrid, Barcelona, París, Londres o Nueva York.
Agora, en Xixón al Día falamos con Oliva Aguirre, responsable y Project Manager de Candlelight pa conocer el proyectu dende dientro:
Dempués del ésitu de Candlelight en más de 100 ciudaes, llegáis a Xixón con un espectáculu que va facer esfrutar a los asistentes d’esti eventu tan especial. ¿Cómo se vive esta popularidá que ta teniendo’l proyectu?
Fever busca siempre aumentar el so alcance y asitiase como la plataforma cola que’l públicu puede cuntar p’afayar les meyores esperiencies na so ciudá. Colos conciertos Candlelight buscamos democratizar l’accesu a la música clásica mientres presentamos una variedá de programes musicales pa tolos gustos, afayamos espacios únicos que formen parte del patrimoniu cultural de les ciudaes, dando visibilidá a talentosos artistes locales y too ello nun ambiente únicu. Tres l’ésitu n’España y el mundu, arguyeznos poder llevar esta esperiencia a Xixón y averar la música clásica a más rincones del país.
Allá onde vais, Candlelight enllena tolos sos asientos. ¿Qué ye lo que llama tanto l’atención al públicu?
La música clásica tien munches tradiciones qu’anguaño pueden alloñar de lo que busca’l públicu, dende permanecer en silenciu y nun aplaudir ente movimientos, hasta que los músicos se vistan de negru pa tocar. Siguiendo la nuesa misión de democratizar l’accesu a la música clásica, los conciertos Candlelight ufierten un formatu de presentación más flexible. Reconocemos que los patrones de consumu camudaron a lo llargo de los años, especialmente pa los mozos, y al ufiertar una esperiencia d’inmersión más multisensorial, realmente tamos notando qu’una audiencia más amplia y diversa avérase a los espectáculos. La introducción de programes de «tributu» más alliniaos con artistes de jazz, rock y pop, pero interpretaos por un cuartetu de cuerdes y otros preseos clásicos, tamién nos dexa conectanos con una audiencia más amplia que nunca antes nun considerara un conciertu de música clásica. Pa los que yá s’interesaben pol xéneru clásicu, los conciertos Candlelight conviden a afayar nuevos espacios nes sos ciudaes, tou nel ambiente únicu de la lluz de les veles.
Definís esti espectáculu como “música en vivu d’una manera dafechu nueva” pero ¿cómo surde esta idea?
Repitiendo un poco lo dicho enantes, los conciertos Candlelight llanzáronse cuando Fever vio la necesidá de facer qu’esti xéneru fuera más accesible pa los sos usuarios, coles mires de llegar a un nuevu grupu demográficu y crear conciertos más afayadizos pa toos. Los conciertos Candlelight dexen qu’una audiencia más amplia que quiciabes nunca antes considerara un conciertu de música clásica conecte coles pieces más icóniques de los meyores compositores y escuche los meyores ésitos d’artistes conocíos d’una manera distinta.
Iguar la puesta n’escena y crear l’ambiente nun va ser xera cenciella.
Nos conciertos Candlelight, los invitaos non solo tán arrodiaos de miles de veles, sinón que la esperiencia se vive nun llugar dafechu distintu a los tradicionales que suelen allugar conciertos de música clásica, los asientos munches vegaes tán alredor de los artistes y non frente a ellos. Amás d’esti ambiente íntimu, la conexón ente los músicos y l’audiencia ye muncho más fuerte y cercana, yá que mientres les presentaciones los músicos falen directamente cola audiencia sobre les músiques del programa ya intereses del artista.
En Xixón, Candlelight va agradar a la ciudá coles obres de Coldplay esti próximu 11 d’agostu, pero son munchos los artistes que se reinterpreten nel espectáculu. ¿Cómo s’escueyen esos grupos y afáense a esti formatu?
En Candlelight, utilizamos un enfoque basáu en datos y desenvolvemos los nuesos programes en base a una combinación d’encamientos del nuesu equipu internu de curaduría ya investigación que tien en cuenta métriques globales y comentarios de la nuesa audiencia y músicos. Amás, siempres contratamos talentosos músicos locales que s’allinien cola nuesa creencia de que la música clásica puede llegar a una audiencia diversa, y demostrámoslos interpretando composiciones pa tolos gustos. Los conciertos Candlelight brinden una plataforma pa que los músicos conecten con persones de tol mundu y creen nueves oportunidaes pa facer lo qu’amen.
Tamién hai espaciu pa la música que se alloñar un tanto del circuitu comercial actual, con obres de Hans Zimmer (1 de setiembre) o Vivaldi (25 d’agostu). ¿Son tan bien recibíes pol públicu como’l restu? ¿Apréciase xuna diferencia d’edá dependiendo de l’actuación?
Primeramente, los conciertos presentaben obres de los más grandes compositores, como Vivaldi, Mozart y Chopin. Agora, la llista cada vez más estensa de programes inclúi una amplia variedá de temes y xéneros, que tomen homenaxes a artistes contemporáneos como Queen, ABBA, Coldplay y Ed Sheeran, amás d’espectáculos dedicaos al K-Pop, bandes sonores de películes y muncho más. D’esta manera, guardemos una espansión significativa más allá del tradicional públicu central de la música clásica. Siempres buscamos atender les mires de les audiencies locales y crear programes que satisfaigan los sos gustos. N’España, por casu, vamos presentar un Tributu a Joan Manuel Serrat en Barcelona en septiembre. Amás, apocayá llanzamos les sesiones orixinales, que lleven artistes conocíos y emerxentes a tocar los sos propios cantares nel ambiente únicu del Candlelight, como vamos tener al Club del Río en Comillas n’Agostu.
Abrís pa Candlelight les puertes de la Colexata San Xuan Bautista, un espaciu que, magar nos últimos años ta abriendo a la cultura, nun ye mui habitual. ¿Por qué esti escenariu?
Tenemos en cuenta distintes criterios al escoyer el llugar pa los conciertos: la so hestoria y lo que representa pa la ciudá, el so allugamientu pa que seya accesible pa toos, y característiques técniques como l’acústica de la sala y la lluz, por casu. Los nuesos programes lleváronse a cabu n’impresionantes llugares de tol mundu que destaquen pola so naturaleza histórica o’l so calter únicu, dende azotees modernes con escelentes vistes hasta catedrales, palacios, biblioteques y xardinos icónicos.
