Un ciclo de seminarios para afondar no Selo Europeo de Recursos Humanos en Investigación

Desde o ano 2017, no que acadou o recoñecemento da Comisión Europea polas súas políticas de recursos humanos, a UVigo desenvolve a Estratexia de Recursos Humanos na Investigación (HRS4R). O recoñecemento, que parte da aprobación por parte da Comisión Europea no ano 2005 da Recomendación relativa á Carta do Investigador e o Código de Conduta para a Contratación de Investigadores, ten a finalidade de contribuír ao desenvolvemento dun mercado laboral europeo atractivo para o persoal investigador.

Inmersa no proceso de reacreditación, dado que o recoñecemento debe renovarse cada cinco anos, a UVigo organiza desde este xoves un ciclo de seminarios en liña sobre o Selo Europeo de Recursos Humanos en Investigación (HRS4R), co obxectivo de dar a coñecer as boas prácticas e iniciativas que a institución académica viguesa está a desenvolver, desde o ano 2017, ao abeiro deste proxecto.“Esta acreditación recoñece o esforzo que a UVigo está a facer para ser un lugar máis atractivo para os investigadores e para desenvolver os estándares europeos en materia de investigación”, destaca Belén Rubio, vicerreitora de Investigación da Universidade de Vigo.

O coordinador da rede Euraxess España inicia o ciclo

O ciclo comezará este xoves 17 de febreiro ás 12.00 horas cun relatorio en liña de Xavier Eekhout Chicharro, coordinador da rede Euraxess España e membro da Fundación Española para la Ciencia y la Tecnología (Fecyt). Na súa intervención, titulada La carrera profesional en investigación: herramientas para su desarrollo, Eekhout abordará, entre outros aspectos, o desenvolvemento da carreira profesional en investigación e as ferramentas de apoio que proporciona a rede a través do programa de mentoring Rebeca. 

Á intervención deste xoves, que se poderá seguir a través do Campus Remoto da UVigo, seguiranlle outros cinco relatorios impartidos por diversos especialistas que repasarán os principais beneficios e actuacións da acreditación. Ao remate do ciclo de seminarios as persoas asistentes recibirán un certificado de asistencia.