La gargantada de L'Escañoriu de Corvera aspira a ser Monumentu Natural

Si consigue la declaración va poder recibir fondos europeos que dexen recuperar la sienda

La gargantada de L'Escañoriu, asitiada nel conceyu de Corvera, ta cerca de consiguir la declaración de Monumentu Natural, lo que supondría la so inclusión na Rede Natural d'Asturies. El procedimientu ta entamáu y en fase d'información pública. Si consigue esa declaración, va poder recibir fondos europeos que dexen recuperar la sienda.

La gargantada de L'Escañoriu ye un valle angostu, erosionáu na roca pol ríu Arlós. La so acción favoreció l'apaición de vexetación única na redolada. Un espaciu de singular guapura que quier protexese.

El Conceyu de Corvera espera rehabilitar la zona con fondos europeos, que podríen llegar cola declaración de Monumentu Natural. Sedría'l tramu que va ente l'entamu la sienda y la primer cascada, unos 600 metros de distancia.