Desactiváu'l Plan Especial d'Inundaciones del Principáu

La ivernada marítima entama a abocanar na mariña asturiana

El Principáu desactivó'l Plan Especial d'Inundaciones, dempués de que'l caudal de los ríos menguara pasu ente pasu. Dalgunos de los vecinos del conceyu de Pravia tán sorprendíos de lo muncho que baxó'l ríu en menos de 24 hores.

El Narcea volvió al so calce. Dempués d'unes hores complicaes, el caudal d'esti ríu menguó abondo. Polo que les carreteres de Quinzanas qu'ayeri se cerraron de forma preventiva, esta mañana, yá s'abrieron al tráficu.

Apocayá, la Confederación Hidrográfica tuvo acondicionando'l ríu. Polo que dellos vecinos consideren qu'esta midida sollivió les consecuencies de la riada.

En Belmonte, onde ayeri desbordó'l Pigüeña, tamién van recuperando la normalidá. Yá desaguaron les zones inundaes, lo que dexó a la vista dalgunes de les consecuencies de la riada.

Polo que'l conceyu de Miranda va presentar un proyectu a la Confederación pa que se refuercen les defenses nel tramu nel que se dieron les llenes.

La ivernada marítima y de vientu entama a abocanar

Los bufones de Pría volvieron a bramar güei con tola so rellumanza gracies a les foles d'hasta seis metros d'altor y a les fuertes raches de vientu qu'azotaron tola mariña oriental asturiana a lo llargo la mañana.

Una xornada perfría na que dalgunos de los pocos visitantes que fueron a inmortalizar esti singular espectáculu de la natura llanisca acabaron empapaos dafechu pola fuerza de la mar Cantábrica y de los bufones.

La mar tamién cutió con fuerza la mariña de Navia con foles d'hasta cuatro metros d'altor. Yá pela tarde, les escamplaes fueron ganando espaciu a les nubes y el vientu foi afloxando, polo que munchos aprovecharon pa practicar deporte o dar un paséu per estos espacios naturales de la mariña occidental asturiana.

La ivernada marítima y de vientu va dir abocanando les próximes hores en tola mariña asturiana, según les previsiones meteorolóxiques.

Mañana'l vientu va venir del sur, pero con menos fuerza.