1. Ñucanchicunaca ¿imatata seguro capanchi?

JEHOVÁ DIOSCA paita sirvijcunataca ninandami juyan. Shinallata paica para siempremi juyashpa catinga. Ashtahuambash Jehová Diosca imatapash alita ruranataca ninandami alicachin (Sal. 33:5). Shinapash ñucanchicunaca ¿imatata seguro capanchi? Primero, Jehová Diosca paita sirvijcunata nali gentecuna yangamanda llaquichi tucushcata ricushpaca ninandami llaquirin. Segundo, Jehová Diosca nali ruraicunata tucuchinatami seguro capanchi. Chuscu yachajuna temacunamanda * callari temapica Jehová Dios israelitacunaman Leycunata cushcatami yachajuparcanchi. Chai leycunaca juyarishpa causachun, imatapash alita rurashpa causachun, imagutapash na charijcunata ayudachunmi chai leycunaca ayudarca (Deut. 10:18). Chai leycunaca Jehová Dios paita sirvijcunamanda ninanda preocuparishcatami ricuchin.

2. ¿Ima tapuicunatata yachajupashun?

² Moisesman cushca Leyca huata 33​pi, punda congregación tiai callari punllapimi tucurirca. Shinaca Jesusta ali catijcunaca juyarinata, imatapash alita ruranata yachachij leyta ¿ñana charinatachu ricuchijurca? Na, paicunaca shuj mushuj leytami cazuna carca. Jesusta catijcunaca Cristopa mandashcatami cazuna carca. Cai temapica Cristopa mandashca ima cashcatami pundapi yachajupashun. Shinallata cai tapuicunamandapashmi yachajupashun:  Cristopa mandashcaca ¿imashinata juyarichun ayudan? ¿Imashinata imatapash alita rurachun ayudan? Cristopa mandashcaca ¿imashinata ñaupaman pushajcuna shujcunata ali tratachun ayudan?

3. Gálatas 6:2​pi nishca shinaca ‘Cristopa mandashcaca’ ¿imata can?

³ (Gálatas 6:2, liingui). Jesusta ali catijcunaca ‘Cristopa mandashcatami’ cazuna can. Jesusca tauca leycunata escribishpaca na saquircachu. Jesusca instrucciongunata, mandashcacunata, Bibliapa yachachishcacunata paita ali catijcuna pactachishpa causachunmi yachachirca. ‘Cristopa mandashcaca’ Jesuspa tucui yachachishcacunami can. Caimanda ashtahuan ali intindingapaca huaquin tapuicunamanda yachajupashun.

4, 5. a) Jesusca ¿imashinata gentecunataca yachachirca? b) Jesusca ¿ima horata gentecunataca yachachirca?

⁴ Jesusca ¿imashinata gentecunataca yachachin carca? Jesusca paipa parlocunahuanmi Taita Diosmanda cabalta yachachirca. Shinallata gentecuna imapa causajta, Diospa Reino o Gobierno mundo enteromanda tucui llaquicunata tucuchinatami Jesusca gentecunaman aliguta intindichirca (Luc. 24:19). Jesusca paipa causaihuanmi paipa catijcunataca yachachirca. Shinami Jesusca paicunapa alipacha ejemplo carca (Juan 13:15).

⁵ Jesusca ¿ima horata gentecunataca yachachirca? Cai alpapi cashpami gentecunamanga yachachirca (Mat. 4:23). Shinallata Jesusca causarishca jipallami paita catijcunataca yachachirca. Chaipimi 500 yali paita catijcunaman ricurishpa Jesusca shujcunapash paipa catijcuna tucuchun ayudachun mandarca (Mat. 28:19, 20; 1 Cor. 15:6). Jesusca jahua cieloman rishca jipapashmi congregaciongunataca ñaupaman pushashpa catirca. Por ejemplo, casi 96 huatapimi ungido huauquipanicunata shinllichichun, consejachun Jesusca apóstol Juanda utilizarca (Col. 1:18; Apoc. 1:1).

6, 7. a) ¿Jesuspa yachachishcacunataca Bibliapa maijan librocunapillata yachajui ushapanchi? b) Cristopa mandashcata cazungapaca ¿imatata rurana capanchi?

⁶ Jesuspa yachachishcacunataca ¿maipita yachajui ushapanchi? Mateo, Marcos, Lucas, Juan librocunapimi Jesús cai alpapi cashpa imacunata rurashcata, imacunatalla yachachishcatapash yachajui ushapanchi. Escrituras Griegas Cristianas o Mushuj testamento librocunaca  Jesús shina pensachunmi ayudan. Chai librocunata escribij runacunaca espíritu santo yarichijpimi escribirca. Shinallata paicunaca ‘Cristopa yuyaitami charirca’ (1 Cor. 2:16).

⁷ ¿Imatata yachajupanchi? Jesuspa yachachishcacunaca ñucanchi causaipica ninandami ayudan. Chaimi huasipi, trabajopi, escuelapi o colegiopi, congregacionbi cashpapash Cristopa mandashcata cazuna capanchi. Escrituras Griegas nishcata liishpa, liishcapi pensarinami Cristopa mandashcata yachajuchun ayudan. Shinallata Jesuspa yachachishcacunata, mandashcacunata, ñucanchi causaipi pactachishpami Cristopa mandashcata cazujushcata ricuchipanchi. Chaita cazushpaca ñucanchi juyaj Jehová Diostami cazunajupanchi. Jehová Dios yachachishcatami Jesuspash yachachin carca (Juan 8:28).

8. Cristopa mandashcapica ¿imamandata yachachin?

⁸ Huasita shayachingapaca ali columnacunata shayachinami minishtirin. Shina ali huasichishca huasigupi causajcunaca seguromi sintiringa. Shina cuendami Cristopa mandashcapash ñucanchicunapa causaipi seguro sintirichun ayudan. Cristopa mandashcapica juyaimandami yachachin. ¿Imamandata shina nipanchi?

9, 10. a) Gentecunata juyaimandaca Jesusca ¿imatata rurarca? b) Jesushna cashcataca ¿imashinata ricuchi ushapanchi?

⁹ Primero, Jesusca juyaimandami imagutapash rurarca. Jesusca gentecunata juyaimandami paicunata yachachirca, ungüita charijcunatapash jambirca, ashtaca gentecunamanbash micunata cararca, huañushcacunatapash causachirca (Mat. 14:14; 15:32-38; Mar. 6:34; Luc. 7:11-15). Chaita rurangapaca tiempota, fuerzatapashmi Jesusca minishtirca. Jesusca paipa munaita huashaman saquishpami shujcunata cushilla ayudarca. Shinallata gentecunamanda pai huañushpami paicunata ninanda juyashcata ricuchirca (Juan 15:13).

¹⁰ ¿Imatata yachajupanchi? Ñucanchicunapashmi Jesushna ñucanchi munaita huashaman saquishpa shujcunata ayudana capanchi. Shinallata villachijushpaca gentecunata llaquishpami tratana capanchi. Gentecunaman Bibliamanda villachishpa, yachachishpami Cristopa mandashcata cazunajushcata ricuchipanchi.

11, 12. a) Jehová Dios ñucanchimanda ninanda preocuparishcataca ¿imashinata yachapanchi? b) Jehová Dioshna huauquipanicunata juyangapaca ¿imatata rurana capanchi?

¹¹ Segundo, Jehová Dios gentecunata ninanda juyashcatami Jesusca yachachirca. Jehová Dios paita sirvijcunamanda preocuparishcata, cada unota ninanda juyashcatapashmi Jesusca yachachirca (Mat. 10:31). Shinallata expulsai tucushcacuna arripintirishpa Jehovapaman cutin tigramuchun Jehová Dios munashcatami Jesusca yachachirca (Luc. 15:7, 10). Jehová Diosca gentecunata ninanda juyaimanda, paicunata salvangapaj munaimandami paipa Churigupa causaita curca. Chaitami Jesusca yachachirca (Juan 3:16).

¹² ¿Imatata yachajupanchi? Jehová Dioshna huauquipanicunata juyangapaca ¿imatata rurana capanchi? (Efes. 5:1, 2). Huauquipanicuna Jehovapa ñaupajpi ninan valishca cashcatami pensana capanchi. Shinallata expulsai tucushcacuna arripintirishpa Jehovapaman tigramujcunataca alimi chasquina capanchi (Sal. 119:176). Huauquipanicuna imata minishtishcacunapi ayudashpami paicunata juyashcata ricuchishun (1 Juan 3:17). Shinami Cristopa mandashcata cazunajupanchi.

13, 14. a) Juan 13:34, 35​pica ¿ima mushuj mandashcatata yachachin? b) ¿Imamandata mushuj mandashca nipanchi? c) Cristopa mandashcataca ¿imashinata cazuna capanchi?

¹³ Tercero, Jesusca paishna shujcunata juyachunmi mandarca (Juan 13:34, 35, liingui). Israelitacunaman cushca leypica chai mandashcaca na tiarcachu. Chaimi Jesusca shuj mushuj mandashcata curca. Jesusca huauquipanicunata paishnallata juyachunmi mandarca. Shinaca ñucanchimanda ashtahuan yalimi  huauquipanicunata juyana capanchi. Shinallata Jesushnami huauquipanicunamanda huañungapapash munaita charina capanchi. Shina rurangapaca Jesushna juyanami minishtirin.

¹⁴ ¿Imatata yachajupanchi? Cristopa mandashcataca ¿imashinata cazuna capanchi? Ñucanchi munaita huashaman saquishpa huauquipanicunata ayudashpami Cristopa mandashcata cazujushcata ricuchipanchi. Shinallata huauquipanicunamanda huañungapapashmi munaita charina capanchi. Shina juyaita charishpaca tandanajuicunaman mayorlla huauquipanicunata apangapami ri ushapanchi. Shinami ñucanchi munaicunata huashaman saquijushcata ricuchipashun. Huauquipanicunata juyashpaca llaqui apashca llactacunapi huauquipanicunata ayudangapapashmi ri ushapanchi. Shina rurashpami Cristopa mandashcata cazushcata ricuchinajupanchi. Ashtahuangarin congregacionbi huauquipanicuna seguro sintirichunmi ayudashun.

15-17. a) Jesusca imashinata ¿imatapash alita ruraj cashcata ricuchirca? b) ¿Imashinata Jesuspa chaquita cati ushapanchi?

¹⁵ Bibliapi imatapash alita rurana nishpaca Jehovapa ñaupajpi ima ali cashcata ruranatami shina nin. Shinallata na ñavita ricushpalla imatapash alita ruranatami ningapaj munan. Shinaca ¿imamandata nipanchi Cristopa mandashcapica alita rurachunmi yachachin? nishpa.

¹⁶ Primero, Jesús imashina paipa ruraicunahuan tucuita alita ruraj cashcata ricupashunchi. Punda tiempopica, judiocunata ñaupaman pushajcunaca shuj llactacunamanda gentecunataca nimamanda na ricunayachinllu carca. Paicunashna na caj gentecunatapash nalicachishpami ricun carca. Shinallata huarmicunataca na respetashpami tratan carca. Cutin Jesusca alita rurashpami tucuicunatallata igual tratan carca. Shuj llactacunamanda Jesuspi crij gentecunatapash Jesusca alicachishpami tratarca (Mat. 8:5-10, 13). Jesusca na ñavita ricushpalla villachircachu. Paica pobrecunaman, charijcunamanbashmi villachirca (Mat. 11:5; Luc. 19:2, 9). Shinallata huarmigucunataca ali, respetohuan, juyaihuanmi tratarca. Ashtahuanbash shujcuna na ricunayachishca huarmigucunatapashmi Jesusca ali tratarca (Luc. 7:37-39, 44-50).

¹⁷ ¿Imatata yachajupanchi? Ñucanchipash Jesuspa chaquita catishpami na ñavita ricushpalla villachina capanchi. Shinallata pobrecunaman, charijcunaman o shuj religiongunata charij gentecunamanbashmi villachinalla capanchi. Shinallata huauquicunaca Jesushnami huarmigucunataca respetohuan tratana can. Shinami Cristopa mandashcata cazujushcata ricuchipashun.

18, 19. a) Alita ruranamandaca Jesusca ¿imatata yachachirca? b) Chaimandaca ¿imatata yachajupanchi?

¹⁸ Segundo, imatapash alita ruranamanda Jesús ima nishcata ricupashunchi. Bibliapa yachachishcahuanmi Jesusca paita catijcunaman shujcunata ali tratashpa, alita rurachunbash yachachirca. Gentecunata imashina tratanamanda Jesús imata consejashcata ricupashunchi (Mat. 7:12). Tucuicunallatami shujcuna ñucanchita ali tratachun munapanchi. Shina munashpapash ñucanchirami shujcunata ali tratangapaj esforzarina capanchi. Shina rurajpica shujcunaca ñucanchitaca alimi tratanga. Shinapash pipash ñucanchita yangamanda llaquichijpica ¿imatata rurana capanchi? Yangamanda llaquichi tucushcacuna “tutandi, punllandi caparishpa” mañashcata uyashpa Jehová Dios paicunata ayudanapi confiachunmi Jesusca yachachirca (Luc. 18:6, 7). Ñucanchicuna cai tucurimui punllacunapi ima llaquicunatalla charishcataca Jehová Diosca alimi yachan. Chaimi chai llaquicunataca Jehová Dios agllashca tiempomi tucuchinga. Chaitaca Jehová Diosca pactachingapachami (2 Tes. 1:6).

¹⁹ ¿Imatata yachajupanchi? Jesuspa yachachishcata pactachingapaj esforzarishpaca, ñucanchicunaca shujcunata ali tratashpa, alita rurangapami munapashun. Shinallata Diablopa  cai mundopi yangamanda llaquichi tucushca cashpaca Jehová Diospimi confiana capanchi. Jehová Dioslla chai llaquicunata tucuchinata yachashpami ninanda cushijupanchi.

20, 21. a) Ñaupaman pushajcunaca ¿imashinata shujcunata tratana can? b) Cusacunaca ¿imashinata huarmigutaca juyana can? c) Taitamamacunaca ¿imashinata huahuacunataca tratana can?

²⁰ Imashinami yachajuparcanchi, Cristopa mandashcapica juyarichunmi yachachin. Chaimi ñaupaman pushajcunaca shujcunata juyaihuan, respetohuan tratana can. Shinami Crishpa mandashcata cazujushcata ricuchin. Shinallata shujcunata juyachun Jesús mandashcataca ñaupaman pushajcunaca na cunganachu can.

²¹ Familiapi. Cusacunaca imashinami Jesús ‘tandanajuj crijcunata juyarca’ shinallatami paicunapa huarmitaca juyana can (Efes. 5:25, 28, 29). Cusacunaca Jesuspa chaquita catishpami paicunapa huarmipa munaita pundapi churashpa, huarmiguta ninanda juyashcata ricuchin. Huaquin cusacunapaca shujcunata nali tratana costumbreta charij familiapi viñaimandami, Jesushna juyaita ricuchinaca shinlli ricurin. Shinapash chai costumbreta saquina shinlli cajpipash Cristopa mandashcata cazungapami cusacunaca esforzarina can. Shinaca Jesuspa mandashcata cusa cazujpica paipa huarmiguca respetangami. Shinallata taitamamacunaca paicunapa huahuacunata ciertopacha juyashpaca parlocunahuan, ruraicunahuanmi ricuchina can (Efes. 4:31). Ashtahuanbash juyaj taitamamacunaca huahuacunata juyashpa, alicachishpa tratajpica huahuacuna seguro sintirichunmi ayudapanguichi. Shinami huahuacunaca taitamamacunapi confiashpa, juyaitapash juyanga.

22. a) 1 Pedro 5:1-3​pi nishca shinaca huauquipanicunaca ¿pipa llamagucunashnata can? b) Huauquipanicunataca ¿imashinata ancianocunaca tratana can?

²² Congregacionbi. Congregacionmanda huauquipanicunaca Jehovapa llamagucunashnami  can (Juan 10:16; 1 Pedro 5:1-3, liingui). Bibliapica huauquipanicunataca ‘Taita Diospa llamagucunashnami’ can ninmi. Chaimi Jehová Diosca huauquipanicunata juyaihuan ali tratachun munan. Chaitaca huauqui ancianocunaca na cunganachu can (1 Tes. 2:7, 8). Ancianocuna juyaihuan huauquipanicunata tratajpica Jehová Diosca alicachishpami ricunga. Huauqui ancianocuna huauquipanicunata juyaihuan tratajpica, huauquipanicunapashmi respetahuan ancianocunataca tratanga.

23, 24. a) Shuj huauqui o pani jatun juchata rurajpica ¿imashinata ancianocunaca ayudan? b) Shuj huauqui o pani jatun juchata rurajpica ¿imatata ancianocunaca ruran?

²³ Moisesman cushca leypica israelitacuna espiritualmente nali cajpi, plituricuna tiajpi, pitapash huañuchijpimi juezcuna, ancianocuna ayudachun mandarca. Cuntin Cristopa mandashcapica huauquipanicunata espiritualmente ayudachunmi ancianocunataca mandarca. Por ejemplo pitapash huañuchijpi, shuajpi, pitapash violajpi, plituricuna tiajpica ancianocuna espiritualmente ayudashpapash autoridadcunapa maquipimi saquina can. Chaimi autoridadcuna shuj multata cobranata, carcelpi churanata ricunga. Jehová Diosmi autoridadcuna tiachu saquishca (Rom. 13:1-4).

²⁴ Shuj huauqui o pani jatun juchata rurajpica ¿imatata ancianocunaca ruran? Ancianocunaca Bibliapi ricushpami imata ruranata decidin. Paicunaca Cristopa mandashcashnami juyaita ricuchin. Huaquinbica shuj huauqui o pani jatun juchata rurashpami congregacionmanda shuj huauquita o panita llaquichishca. Chaimi ancianocunaca llaquichi tucushca huauquita o panita juyaihuan ayudan. Shinallata jatun juchata ruraj huauqui o pani arripintirishca o na arripintirishcata ricungapami ancianocunaca paicunatapash juyaihuan ayudan. Ashtahuanbash juyaimandami ancianocunaca jatun juchata ruraj huauqui o pani Jehovapa ñaupapi cutin ali ricurichun ayudan.

25. Cati temapica ¿imatata yachajushun?

²⁵ Ñucanchicunaca Cristopa mandashcata charimandami ninanda cushijupanchi. Tucuicunallata Cristopa mandashcata cazushpaca congregacionbi huauquipanicuna cushilla, tranquilo, seguro sintirichunmi ayudashun. Cunanbica ‘ashtahuan naliman tigraj’ gentecunapurapimi causanajupanchi (2 Tim. 3:13). Chaimi na cungashca causana capanchi. Congregacionmanda pipash shuj huahuata violashca cajpica ¿imashinata Jehová Diosca imatapash alita ruraj cashcata ricuchin? Caita tapuitaca cati temapimi yachajupashun.