ORANJESTAD, Aruba – 12 di Mei 2016: AHATA a vocifera awe oposicion completo na e proyecto di ley pa cambia e forma cu e hotelnan ta haya permit, cu Ministro di Turismo, Transporte, Sector Primario y Cultura a manda pa Parlamento. E ley tambe ta propone pa regula e cantidad di pakete all-inclusive cu e hotelnan lo por bende.
CEO di AHATA, James Hepple, papiando na nomber di e 90 miembronan di AHATA, a manifesta cu e ley ta propone pa destrui totalmente e formula cu a haci Aruba su industria di turismo asina exitoso. “E exito di Aruba tin como fundeshi fuerte e habilidad di nos hotelnan pa reacciona rapidamente riba e condicionnan di mercado cu ta cambia continuamente. En bista cu mas y mas di nos bishitantenan ta pidi un of otro tipo di pakete all-inclusive y en bista cu mundialmente mas y mas cadena hotelero ta reaccionando riba e demanda aki añadiendo propiedadnan all-inclusive di cinco strea, luhoso y di nivel halto, e cos cu menos nos mester ta pa Aruba keda atras, particularmente awor cu Cuba ta habriendo su portanan”, Hepple a bisa.
Ta bon conoci cu Ministro di Turismo a encarga ATA pa diversifica e mercadonan di origen di Aruba, esta cu ATA mester atrae mas bishitante di Canada, di Europa y di Sur America. “E problema cu esaki ta”, Hepple a bisa, “cu tur e mercadonan ey kier producto all-inclusive. Bo no por tin tur dos forma.”
Hepple a continua: “E cos cu ta molestia nos asina hopi tocante e ley aki ta cu asina hopi poder lo keda concentra den man di e Ministro di Turismo y cu ta e, e so lo dicidi con cada hotel lo mester opera y mercadea su mes, door di limita e hotelnan tradicional na bende no mas cu 20% di nan cambernan riba un base all-inclusive. Nos mayor preocupacion ta cu segun mercado ta evoluciona ta masha probabel cu hopi hotel lo bay opina cu si nan no por ofrece un opcion all-inclusive, e cambernan ey lo keda bashi, ya cu e huespednan potencial lo scoge un otro destinacion, unda e opcion ey si ta existi. Tambe nos sa cu ya el a bisa un hotel caba cu dado caso e ley aki pasa, e lo exigi di nan pa cera hopi di nan restaurantnan, loke lo conduci na perdemento di trabou di un cantidad substancial di empleado.”
Di acuerdo cu James Hepple: “E parti delicado di esaki ta, en caso cu e ley aki pasa, ta cua sector lo ta e siguiente cu Gobierno lo ataca? Lo bisa e restaurantnan ta cua cuminda nan por bende? Lo bisa e detayistanan ta cua producto nan por bende? Lo bisa e productornan ta cua producto nan por traha? Ta na unda e fin ta?” E doñonan di hotel a manifesta nan preocupacion grandi pa e impacto di e ley proponi aki riba viabilidad di nan negoshi na termino largo. Hopi a indica caba cu, en caso cu e ley aki pasa, nan lo corta riba inversion den nan hotel, pa motibo di e incertidumbre crea pa e interferencia di Ministro den e operacionnan diario di nan hotel.
E doñonan ta particularmente preocupa pa e hecho cu di acuerdo cu e ley proponi Ministro di Turismo por kita un permit di hotel all-inclusive despues di 20 aña, si tin un otro participante interesa den ofrece pakete all-inclusive, a pesar di e hecho cu e hotel all-inclusive existente en cuestion lo a inverti durante hopi aña den nan propiedad. E incertidumbre so lo causa grave intrankilidad entre e trahadonan. Kita un permit ta trece gastonan enorme cune y lo inclui kitamento di trabou di hopi empleado. Tambe lo por kita permit di e hotelnan tradicional cu ta ofrece pakete all-inclusive, si Ministro dicidi cu nan no a cumpli cu su reglamentonan.
E CEO di AHATA a reconoce cu a expresa preocupacion pa e echo cu e crecemento di hotelnan all-inclusive supuestamente tabatin un impacto negativo riba e restaurantnan local y e detayistanan local. “Na unda tin evidencia di esaki?”, e CEO a puntra. “E Ministro ta keda referi na un rapport di PWC cu e ta bisa ta sostene su punto di bista, pero te ainda e no a facilita industria hotelero e rapport aki. Y si e sector di restaurant ta bayendo asina malo, con por ta cu e delaster cuater añanan Camara di Comercio a registra mas di 250 restaurant nobo cu a habri nan portanan na Aruba?”
El a bisa: “E problema cu e sector di restaurant tin no ta e hotelnan all-inclusive, sino hustamente e echo cu tin demasiado hopi restaurant na Aruba y ta parce cu niun hende no ta papia di hiba un control riba esey.”
E CEO a continua bisando: “E hotelnan di Aruba ta na un situacion masha dificil na e momentonan aki. Hopi di nan a sufri perdida di negoshi, ya cu nan huespednan a dicidi di cambia pa casnan particular, apartamento y condominio, ora cu nan ta kedando na Aruba. Un di tres parti completo di e bishitantenan na Aruba aña pasa a keda na un cas particular, apartamento of condominio, loke tabata 15% cinco aña pasa. Esaki ta e problema cu Gobierno mester ataca. Entretanto, solamente 14% di nos bishitantenan a hospeda na un hotel all-inclusive na 2015, bahando di 16% na 2011.”
Sr. Hepple a conclui: “Nos ta completamente confundi tocante esaki. Na final di 2014 Ministro di Turismo a anuncia orguyosamente cu el a facilita e desaroyo proponi di un propiedad all-inclusive di 900 camber na San Nicolas. Nos no por compronde dicon loke ta bon pa San Nicolas, no por ta bon pa e resto di Aruba. AHATA no tin problema si pone un cierto sorto di obstaculo of limitacion riba e cantidad di pakete all-inclusive cu sea hotel nobo, proyecto of hotel den construccion, of permit di hotel nobo of tur “vestigingsvergunning” recientemente emiti por bende. Pero AHATA no ta y lo no acepta limitacion of modificacion di permit operacional ya estableci.”
“Nos preocupacion basico ta simpel. Turismo ta genera 90% di nos entrada y empleo. Nos tin un formula cu ta traha. Pakico cualke persona lo kier destrui esey y reemplas’e cu maneho gubernamental di e sector critico di nos economia?” E CEO a bisa cu AHATA lo ta reuniendo separadamente cu e miembronan di Parlamento di AVP y di MEP diahuebs dia 12 di mei pa discuti e cuestion aki mas aleu.