E sindicato di Polis di Aruba (SPA) awe a adverti Gobierno cu nos ta un siman leu for di e deadline pa yega na acuerdo cu Hulanda y ainda no ta tende nada di Gobierno. Riba dje Polisnan ta scuchando cu Minister Presidente tin pensa di no firma e acuerdo, cu lo haci cu mester corta gasto pisa den Gobierno. Ta taha Gobierno pa no mishi cu salario ni beneficio di Polisnan, pa evita problema inecesario, asina Presidente di SPA, Jose Dirksz a bisa awe tardi para dilanti Ward’i Polis di Noord.
No solamente e polisnan di e districto di noord (Warda di Shaba) pero tur e 600 miembronan di Cuerpo Policial en general ta preocupa cu e incertidumbre cu ta biba cu desicion y proposicion cu Gobierno a manda pa Hulanda, e contra proposicion cu te ainda no ta conoci cerca ningun sindicato y si acaso lo bay corta den presupuesto cu consecuencia cu lo corta aun mas den nan salario, den overtime cu te ainda ta pendiente.
Den e situacion cu pais ta aden, Polis ta sinti cu nan ta e prome yama, den e “frontline” di e pandemia y crisis pero ta e prome pa perhudica tambe. Joselito Dirks ta conta cu ta mira un “second wave” cu ta na caminda pa e pandemia di Covid-19 cu tin full e isla preocupa. Pero tambe ta consciente cu tin un deadline pa e fecha di 14 di augustus ta e ultimo dia pa pais Aruba duna Hulanda un contesta riba e Landelijk pakket y si acaso lo bay firma si of no.
Consecuencia na momento cu no firma lo ta e miedo cu gobierno lo bay sigui corta den salario di Polis locual sin duda lo traduci den problema serio. Esaki ta di dos biaha cu apenas e pandemia ta cuminsa, cu Polisnan ta cla pa yama accion den caso cu no cumpli cu nan salario. Dirksz a sigura cu Polisnan ta cla pa traha, nan stima nan trabou, nan no mester aplauso, djis nan salario. Tanten cu nan salario ta garantisa, nan ta cla pa sigui traha normal. Pero awor, cu e suspenso cu Gobierno no ta transparente cu pueblo ni cu su ambtenaarnan, ta dificil pa keda sin ta preocupa y sin expresa adelanta locual lo por sosode den caso cu faya cu salario di e defensornan di ley.
